夏天已經來臨，收身騷肌並唔係女士們嘅專利，好似年屆57歲嘅李子雄，昨日就喺微博上載咗佢健身嘅騷肌相，佢仲留言話：「健身篇：管不住嘴邁不開腿，怎麼敢在夏天肆意得瑟呢！肌肉、肥肉，自己決定吧！」
其實李子雄除咗健身鍛鍊肌肉外，佢仲會游水鍛鍊身體，之前佢就貼咗游水嘅相，仲話：「游泳的好處：全身的運動，增強身體的免疫力，不容易感冒，還可以減肥！只要每天游上1000米，就可達到減去腰間贅肉的效果，騙你是小狗」。一日游1000米，唔怪得57歲嘅李子雄，仲保持得咁好啦！
此外，現時仍主力喺大陸發展嘅李子雄，最近就參與大陸電影《功夫舞娘》嘅演出，電影喺上海松江拍攝，日前劇組就喺微博貼咗一啲拍攝嘅幕後花絮，仲話李子雄喺戲入面係一個神秘角色，只話電影係一部融合武術同街舞元素嘅動作電影。