除咗常任秘書長，紀律部隊首長亦要申報利益，雖然大家不時批評警隊，但八方真係不得不讚警務處處長盧偉聰，唔係因為警隊一哥樓多或樓少，投資有道抑或一窮二白，而係環顧咁多位高官中，佢嘅申報係最仔細！一哥申報有3層樓揸手，但唔似普遍高官只寫物業位於港島、九龍定新界區，而係寫明單位所在地，從佢嘅申報可見，佢喺黃埔花園、火炭麗禾里同埋九龍灣麗晶花園都有物業，除咗黃埔單位，其他兩個係自用，申報嘅資產好清楚，而有別於普遍政務官，佢冇港島樓喺手噃！
海關關長鄧忍光則申報持有兩個物業，除咗九龍區一個住宅自用，另一個喺港島區嘅商業單位，佢持一半業權，用以出租；至於入境處處長曾國衛，則申報咗只持有一個位於東莞嘅住宅用嚟自用咋。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk