國際兒童節無分國界，除咗小朋友可以玩餐飽，對初為人母嘅媽咪，感受亦好深。
舊年7月，李心潔以40歲高齡，為老公彭順生咗對孖仔，轉吓眼，孖仔已經11個月大，經過11個月努力收身，李心潔近排已經回復纖瘦身形。昨日國際兒童節，李心潔就喺微博寫咗一大段文章，向大家分享佢陀孖B嘅歲月。
李心潔話當得知自己陀孖B開始，醫生話驚孖B容易早產，已經再三叮囑叫佢唔好做運動，對一個好動嘅人嚟講，其實會覺得有啲痛苦。不過為咗BB健康着想，惟有盡量少郁動。
除此之外，李心潔亦話自己陀孖B期間，變得相當大食，試過一次過吞落一個半Pizza，體重一路由50公斤飆到69公斤。
懷孕期進入7個月時，個肚大到需要用輪椅代步，連心潔身邊嘅朋友都好驚訝，咁瘦小嘅身形可以撐得住咁大個肚。
臨生前嘅兩個禮拜，醫生就吩咐心潔要入院臥床，最後孖B喺35周出世。李心潔留言話：「我永遠也無法忘記兩個兒子一來到人間的哭聲，首先是一把哭聲，隔了兩分鐘另一把哭聲響起重疊在一起，奏成了我生命中最珍貴，最幸福，最感動的交響曲。」