就咁講「林偉健」三個字，你可能未必記得佢係邊個，但係講番佢嘅事跡可能你就會有啲印象。話說林偉健曾經係體操運動員，身手了得，所以喺無綫台慶上面經常賣命演出高難表演。
以前無綫台慶表演真係幾好睇㗎，係碼唔會成日有班藝人走出嚟，化個奇怪妝，然後成班人打打鬧鬧，笑完就算當表演。
要數最經典，一定要講「開心果」沈殿霞！肥姐予人開心嘅感覺，一有佢嘅地方就有笑聲，除咗笑聲洪量，而且都非常「有份量」。相信大家一定記得，肥姐喺87年台慶表演踩雞蛋，當時一底一底雞蛋疊起好似樓梯咁，身穿紅色運動裝嘅肥姐「步步驚心」咁行上，最後啲雞蛋都冇穿冇爛，真係令人拍案叫絕。
到96年肥姐再次「重量級」演出，當時佢拍住元華一齊變魔術，個魔術將係要將肥姐升到半空，淨係呢個效果到夠大家睇到嘩嘩聲！雖然明知係要有道具先可以表演到呢個魔術，但真係不得不佩服當時啲鋼水！同年仲有汪明荃戴住頭套扮光頭表演，講開阿姐又點少得94年佢又唱又跳熱咖啡呢！
同樣係大家心中嘅開心果，81年「試咪」盧海鵬都有「玩命」表演，就係跳火圈喇！同年仲有曾揚言要「跪回家」嘅阿叻表演踩鋼線。