港交所（388）自從由李小加打骰之後，高層音樂椅冇停過，最新發展就係由兩名老臣子李國強、戴志堅重返神壇，接手聯席營運總裁（COO）一職。
李國強、戴志堅分別於1997、1998年已加入交易所，目前分別擔任市場主管與結算主管，除現行職務外，此後，兩人會一齊做聯席集團營運總裁。兩人都係幾朝老臣子，近年見住唔少新人來來去去，家陣一齊做營運總裁，算係紅褲仔威番次。
點解又換人呢？原因係港交所為統籌同協調旗下倫敦金屬交易所（LME）、LME Clear同前海聯合交易中心，所以新成立「資訊技術及平台發展科」，又增設「集團首席資訊技術總監」、「集團副首席資訊技術總監」兩個新職位。原本做COO嘅冼博能（Trevor Spanner），就會做新任嘅首席資訊技術總監。
佢另一個職位、集團風險總監，就會留任到有合適人選接任為止。而副首席資訊技術總監呢個位，就會由原任資訊技術聯席主管梁松光出任，佢亦兼任香港首席科技總監，接替最近榮休嘅周騰彪。
冼博能其實2015年尾從倫敦調來香港，當時話主理新成立嘅「平台發展科」，早前合併成「風險管理及平台發展」，今日又再變成「資訊技術及平台發展科」，呢個平台發展科認真多發展。
睇完以上一堆title同部門名，暈未?
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk