恒基地產（012）旗下美麗華（071）噚日舉行股東會，人稱「四叔」嘅大股東李兆基冇現身，不過佢細仔李家誠就戴住黑超出現，驟眼睇好似「四哥」謝賢咁有型有款。但查實佢好陰功豬呀，早前因為視網膜受損要做手術，所以要戴黑超護眼。
李家誠身為美麗華主席兼行政總裁，負責主持股東會。大家見到李家誠喺室內戴黑超，當然覺得好奇怪，一定要八卦吓喇。原來佢視網膜受損，早排做咗個小手術，之但係，佢就唔肯講因乜事整親視網膜，只係搖搖手示意此乃小事一件，已經搞掂。
攝記貼心關閃燈
現場所見，李家誠嘅右眼依然有啲紅腫，亦唔可以接觸強光，各位攝影哥哥好識做，熄晒閃燈先影佢相。
李家誠都算係咁㗎喇，眼睛唔舒服都冇話開完會就快閃，會議結束，有小股東上前同佢傾偈，佢都邊行邊講。下周一輪到恒地舉行股東會，佢應該陪四叔出席喇。
講開又講，恒地嘅行家，新地（016）同長實（1113）近期先後改行五天工作，恒地當然跟大隊，將於7月1日改行五天工作。雖然遲過同行少少，但遲到好過冇到。聽講，恒地轉五天工作後，每日工時會加長半小時，不過比起星期六要返工，爽好多喇。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk