今朝（1日）就見周日（4日）之戰嘅排位表新鮮出爐，再望吓戲肉第七場三級賽獅子山錦標（1600米），就見到十三屆冠軍騎師韋達竟然要造113磅去策騎告東尼馬房嘅「上利多」出戰。
皆因韋達算較為高大嘅騎師，平時最輕都係造開118左右嘅磅數，今次十三少毅然要減多幾磅，雖然可以超兩磅，但過程肯定水都唔敢飲多滴，睇嚟佢見到呢期莫雷拉同潘頓因為要去日本跑安田紀念賽（一級賽1600米）而缺席，似乎要喺六四賽日整鋪大搞作。
查看數據，十三少最近五匹要造115磅或以下嘅座騎，只係輸咗「太陽好好」（已退役），其餘四駒全部贏晒，分別為「陽明飛飛」（已退役）、「隨心隨意」、「神舟十號」（已退役）及「天才」，有八成嘅勝出率，真係唔好睇少達仔嘅決心，而佢近兩戰贏三場，狀態弗到漏。
上仗嘉琦BB騎「上利多」搞到滿城風雨，今仗十三少接手戰意十足，只要用佢多年嘅經驗嚟駕馭呢匹馬，睇怕呢場獅子山錦標都實食冇黐牙。