滙控（005）近年成日改組又還原，連跟傳媒打交道嘅公關部都唔例外。聽聞，上星期獅子行發出內部通告，出任滙控公共事務（Public Affairs，PA）集團主管未夠兩年嘅Katja Hall已經辭職。
PA呢個部門，2015年底先至一拆二，分出來。據講，PA將會同僱員意見及通訊部（Employee Insight And Communications，EIC）合併還原，由行政總裁歐智華嘅親密戰友－EIC集團主管高沛賢（Pierre Goad）統一掌舵。
呢次部門重新合併後，又會用番未分拆前嘅部門舊名，即係Global Communications（環球企業傳訊部），真係聽都頭暈。
獅子行嘅部門同名稱，近年改完又改，咪講外人睇唔明，怕且內部員工都要時間消化。
其實呢個公關部前年10月先至一拆二，其中主管傳媒兼NGO關係嘅新部門，就叫PA，另一個就係EIC。滙控隨後外聘Katja Hall出掌PA，伊人原任英國工業總會（CBI）副總幹事，亦曾於英國廣播公司任職，不過已經拜拜了。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk