候任特首林鄭月娥仲有一個月就坐正，政圈流傳嘅新班子名單，部份新貴係來自現屆政府嘅高官。查實唔少AO常秘「禾稈冚珍珠」，有唔少物業揸手，而常秘D8級嘅政府高官都要申報利益供市民查閱。八方睇過嘞，運房局黎以德與太太、即係教育局黎陳芷娟呢對常秘夫妻檔，以6個物業膺「樓王」同「樓后」；即將「升呢」做政制局長嘅食衞局聶德權投資亦有道，連同太太喺香港、內地同英國三地都有樓喺手！
黎以德同陳芷娟各自申報6個物業，除咗一個自住單位，喺港島區仲有兩個住宅單位同一個車位放租，喺英國則有兩個單位出租。其他有樓常秘亦唔少，財庫局常秘黃灝玄申報喺香港同英國分別有兩個同3個物業，普遍唔係全資擁有。
商經局容偉雄同運房局應耀康，各自申報持有4個物業，共通點全部係香港樓，冇喺中國或海外置業，果然「家是香港」，但佢兩位嘅物業豐厚度，都不及下屆政制及內地事務局局長大熱、現為食衞局常秘嘅聶德權。
聶德權申報持有5個物業，除咗一個新界區住宅自用，另外喺內地及英國分別有3個同1個住宅單位。3個內地物業中，兩個喺中山，佢持有嘅就自用，太太持有嘅則出租，另一個喺杭州嘅住宅單位亦由太太持有，英國嘅單位則係放租用。據聞聶德權過往買過太古城，但較早前已經賣咗，家陣喺手嘅係大圍曉翠山莊。
羅智光3物業分佈港英
同樣盛傳入局嘅保安局常秘羅智光呢，則申報咗喺新界同英國共有3個物業，一律非全資擁有。另外，盛傳因為謝偉銓做唔到發展局局長而要捱義氣頂硬上嘅黃偉綸，申報只有一個新界區住宅自用。而候任特首辦秘書長丁葉燕薇就申報喺香港與配偶共同持有九龍區物業自用，另一有個單位喺倫敦出租。
唔少常秘都申報有物業出租或自用，但竟有兩位「冇殼蝸牛」就係政制局張琼瑤同創科局卓永興，兩人申報冇樓揸手！
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk