【馮仁昭四圍超】華仔甩枴杖 明年內地開騷

【馮仁昭四圍超】
華仔甩枴杖 明年內地開騷

劉德華今年1月中喺泰國拍廣告墮馬,盆骨多處骨折,急急回港治療,喺養和醫院住咗近兩個月後出院回家休養,好彩華仔康復程度比預期理想,佢已經可以喺屋企唔靠枴杖行路約10分鐘,不過出街時,醫生仍建議佢用枴杖輔助行路比較安全,因為出街人多,最好避免受到碰撞而跌倒。
其實華仔好聽醫生話,盡量唔去人多地方,不過上周華仔已故戰友陳佩華嘅家人喺九龍城為陳舉行安息禮拜,華仔就堅持出席,送佩華姐最後一程。
雖然華仔康復進度理想,但今年估計不會立刻復出拍戲,不過佢主演嘅電影上映,佢會盡量配合宣傳,9月佢投資兼主演嘅《熱血合唱團》上映,最近佢已經關注套戲點樣宣傳。另外,華仔方面宣佈明年舉行內地巡迴演唱會,詳情將於年底另行公佈。
而之前上映嘅《拆彈專家》喺香港票房約收2,500萬,內地約收4億人民幣,又刷新華仔自己擔正做主角嘅電影票房紀錄,所以寰宇公司決定開拍續集,預計明年中開拍。

華仔上周堅持送戰友陳佩華最後一程,老婆朱麗倩陪佢出席安息禮拜。

《拆彈專家》預計明年中開拍續集,劉德華(左)將以全新角色出現。劇照

《拆彈》開續集

記者噚日致電監製林小強,佢話:「華仔喺電話度都講過要拍續集,我哋當然會全力支持。」戲中華仔嘅角色最後死咗,喺續集又點翻生出現呢?小強話:「我哋只係講拆彈專家嘅故事,華仔可以用另一個人身份出現,故事可以係全新都得嘅,反而夾硬話佢死而復生就比較牽強。我哋都會問吓華仔意見,因為佢都係監製之一。」
撰文:馮仁昭