今年36歲嘅陳冠希(Edison)，盛傳同超模秦舒培結婚生女，做咗人老竇嘅Edison，少咗出道時嘅英氣，添咗一陣陣佬味。
仲記得初入行嘅Edison，俊俏五官幾乎冇乜破綻，惟一俾人話得最多都係歪嘴同行為舉止似馬騮，但無論點睇都叫做靚仔嘛，不過睇番陳生嘅近照……難怪微博同Ig嘅女粉絲，都猛嗌心痛啦！
喺微博同Instagram，最近就有個同Edison個樣有9成似，微博個名叫皇甫聖華(Sam)嘅用戶。89年出生，今年28歲嘅Sam，微博現時有130萬追隨者，而喺Ig，亦有18萬followers。睇番Sam喺微博同Ig嘅相，唔係坐跑車就坐私人飛機，據知一直有幫雜誌影封面嘅佢，曾經有人斟入娛圈，不過本身家底唔弱嘅佢，暫時都仲未心動走去做藝人。
不過，睇番同佢熟嘅藝人，竟然有胡杏兒，杏兒結婚時，Sam都有去婚宴。
而更更更重要嘅嚟，Sam……其實……係女兒身，即係女仔嚟嘅，10個趣你俾幾個？