【《蘋果》專訪】
桃園可結義，也可結怨。5年多前的那個流浮山小桃園飯局，驚爆官商鄉黑勾結烏雲，飯局中人5年來各自修行，際遇不由人，即使是特首梁振英也要放棄連任，當日座上客上水鄉事委員會主席侯志強也有話說：「呢幾年來嘅新界人，真係覺得：『委屈』，可以用呢兩個字嚟形容。」
「過去5年，梁振英政府對新界嘢都有啲忽視咗，佢可能側重咗大多數人；佢成日都講『主流民意』，新界人得幾十萬，未必係佢心目中嘅『主流民意』……當然我覺得佢想攞民意而重視『主流民意』啦……」
「丁屋政策行咗差唔多成50年，你話有啲嘢，踩咗界，當然香港每一個人都要守法，我係認同，法律係白紙黑字叫大家唔好去犯，但唔係有啲『彈弓』，畀你不知不覺等你踩中咗，對新界人係欠一個公道。」
「如果真係立咗法（禁止套丁），真正踩咗呢條線，大家都冇聲出，但你呢個只不過係政策呀，明唔明白？你唔能夠用政策嚟置人哋罪。當然啦，你將佢整上法庭，經法官審完話佢有罪，你唔服氣你就上訴啦，呢啲叫『有冤無路訴』呀……有啲人借助（打擊）套丁嚟討好某方面，我覺得呢個做法唔係咁好囉！」
「佩服佢有膽識」
「梁振英喺管治香港呢5年都有所為嘅，我都好佩服佢有膽識、夠膽做，有啲人左右為難、束手無策……但敢作敢為之餘，都要睇吓我哋呢啲『少數族裔』㗎嘛。我哋唔係要社會保障、亦唔係要保護，我哋要求嘅係公正、公平。政府有權利同義務出嚟講清楚，《基本法》第40條寫明保障嘅新界人權益係乜嘢……丁屋丁權、豁免差餉地租、有葬地，大致都係呢三樣嘢啫。」
「（點解回應梁話搵地『粒粒皆辛苦』時choking my air？）有時係一時之氣。政府搵地，要安排交通、人流同醫療等都好多嘢要睇，好多時政府落嚟諮詢，我哋提好多意見，例如古洞北發展，老人院要安置、居民要安置，畀晒方案政府，但政府視若無睹，揸住自己本天書做嘢，咁你話係咪choking my air，chok住道氣吖？唔應該將搵唔到地嘅責任推去地區，係咪？」
「其實5年前（特首選舉）我哋個心真係冇支持梁振英，但我哋投嘅票係畀咗佢；（等如）一個女仔，老竇話嫁邊個咪嫁邊個囉，雖然你個心覺得侯志強唔係好靚仔，但嫁咗佢嘞，冇計啦，你都跟死一世㗎啦，有乜辦法？鬼叫老竇作主咩！中國人嘅社會係咁㗎嘞！」
■記者許偉賢
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk