阿仙奴領隊雲格周三同阿仙奴續約兩年「永續」成功之後，就呼籲「廠迷」要團結，繼續支持球隊。不過，有網站就死都唔放過佢，整咗條惡搞雲格短片，短片入面雲格變成電影《未來戰士續集》入面嘅反派未來機器人「T-1000」，而佢追殺嘅人就包括咗經常發表「反雲」言論嘅火爆「廠迷」暴龍哥等等，認真搞鬼。
呼籲球迷團結得啖笑
阿仙奴雖然成功捧走英足盃，但喺英超只係排第五，拎唔到下屆歐聯參賽資格，球迷對於領隊雲格依然係分成支持同反對兩派。不過，67歲嘅雲格周三喺同槍手續約到2019年之後接受訪問，有傳有成一億鎊（約10億港元）買人嘅佢就話，自己首要目標係增兵加強球隊實力，「要畀球迷嘅訊息就係乜嘢係球會嘅DNA︰『一齊支持我哋嘅球員、支持球會同埋盡我哋最大努力，令球隊去到我哋想要嘅水平。」雲格仲話自己熱愛呢間球會，仲有傳佢欽點咗般尼茅夫領隊艾迪賀維成為佢嘅接班人。
「永續」雲格對於一班反雲黨嚟講當然係壞消息，有網站更整咗條短片繼續惡搞雲格。片中雲格化身為電影《未來戰士續集》入面嘅反派未來機器人T-1000，喺美國洛杉磯一間精神病院出現，當時正追殺升降機入面嘅人，雲格先將手變成金屬利器，然後將門撬開，一打開門就見到其中一個人，就係經常發表「反雲」言論嘅火爆「廠迷」暴龍哥，嚇到暴龍哥要大叫：「所有人快啲走！」
基昂叫快賣山神奧燒
另外，有位鬱鬱不得志嘅球員可謂「廠迷」整季難以承受之痛，就係西班牙中場辛迪卡索拉。32歲嘅卡索拉自去年10月因為右邊足踝傷患宣告收「咧」，佢日前接受西班牙電台訪問時，更透露至少要多五個月時間，即係到11月先能夠康復。
至於盛傳將會離隊嘅阿歷斯山齊士同奧斯爾去意已決，球隊名宿基昂就認為球隊應盡快賣走佢哋，「今季佢哋過份咁備受注目，正正因為佢哋二月差劣嘅表現（歐聯16強兩回合計負拜仁慕尼黑2:10）令球隊陷入低潮。球隊嘅利益永遠係最大，遠超𠵱兩名球員。」