情色片、風月片、三級片呢啲戲種聽落好似好下流低俗，喺香港拍三級片更加被視為「冇嘢撈」，而三級片男主角向來都被人覺得係有女攬有肉睇嘅「筍工」，但係其實拍所謂嘅情色片對主角嘅演技都好有要求，因為情色片嘅主角都係主角，而點睇自己，其實都係視乎演員自己將自己放喺咩位置，情色同色情，其實好大分別，雖然觀眾嘅焦點永遠都唔會喺男主角身上，不過以下幾位喺因緣際會下演出情色片嘅藝人都非常敬業樂業，即使係比人睇低嘅片種佢哋都用心做好每一個角色。
曹查理
講到香港情色片嘅歷史就不得不提曹查理，演技不俗嘅佢本身演喜劇已經非常拿手，而91年接拍《我為卿狂》同葉玉卿嘅床戲表現出彩，深受觀眾同片商歡迎，更加定下咗佢喺港產三級片嘅地位，而自2000年開始減產嘅佢近年開始再度活躍於幕前。
單立文
本身係音樂人嘅佢初出道拍電影時演技可以話係令人又驚又喜，當年《賭俠》中侯賽因一角更深入民心，而喺情色片上佢演嘅西門慶更加定下咗呢個角色喺大家心目中嘅形象，至於近年佢喺大台都相當活躍。
吳岱融
最近喺大台劇集因為強姦戲彈出嘅佢其實當年都拍過唔少情色片，而且拍攝《滅門慘案之孽殺》時同女主角鍾淑慧撻著，最後兩人更於95年結婚，最近因為劇集角色出位而繼續密密拍劇。
林偉健
昔年每逢大台台慶都會出嚟做高難度表演嘅體操王子林偉健，因為身材突出而且保養得宜而被邀去拍攝情色片，由乖乖運動員到豪放情色男主角嘅反差令人記憶猶新。
吳啟華
吳啟華戲路其實都非常多變，做過醫生、狀師、書生等不計其數，而且不論忠奸都演繹得非常到肉，佢拍嘅情色片例如《玉蒲團之偷情寶鑑》表現都生動鬼馬，非常出色，近排重返大台拍劇。
徐錦江
熱愛藝術創作嘅徐錦江外形剛猛兇悍，喺唔少戲劇當中都做大反派，而佢拍嘅情色片大多都為人熟悉例如《南洋十大邪術》《聊齋艷譚3之燈草和尚》等等，而喺《色情男女》中飾演一位性無能嘅三級片演員，更令佢獲得1997年香港電影金像獎最佳男配角提名，近年醉心藝術喺大陸開設個人工作室。
王書麒
童星出身嘅王書麒細細個就已經參與香港電台嘅兒童劇《小時候》，成為一時家喻戶曉嘅童星，大個之後佢仍然揀做藝人，拍過多部電視劇集，喺94年開始參演多部情色片例如《蜜桃成熟時》系列等，佢喺2000年代淡出演員生涯，03年同歌手許秋怡結婚而且育有一子。
馬德鐘
被網民戲稱「馬神」嘅馬德鐘喺大台做當家小生之前都試過出演情色片，98年嘅《強姦2之制服誘惑》飾演變態牙醫捉走朱茵，癲喪變態到極，演技發揮得淋漓盡致。
葉山豪
身為日本人嘅佢對因為做Model而到香港發展，機緣巧合下接拍當年全球第一套3D情色片《3D肉蒲團之極樂寶鑑》，作為男主角嘅佢花盡心機去為觀眾演繹一段單純嘅愛情故事，除去睇肉之外都可以數係戲中一大賣點，最近佢都積極爭取喺大銀幕繼續出現。