今晚（31日）沙田馬場舉行季內最後一次泥地夜賽，頭場四班泥地1800米，即見一對當旺騎練攜手先拔頭籌，主角史卓豐同葉楚航齊憑「榮冠大道」延續近期勝勢，呢匹澳洲自購馬在港首度上名即贏馬開齋，單Win及組合獨贏A3分別派91及41元。
史卓豐與葉楚航剛周日在沙田雖冇合作贏馬，但兩人就分別勝出「常拼常勝」及「軍必勝」，這晚齊齊再戰沙田馬場，跑道由草地轉為泥地。
兩人憑「榮冠大道」聯手作戰，此駒之前在港十仗最叻前仗得第四，今場在新配搭史卓豐胯下，增程初跑泥地1800米，沿途均速前置跑主動，直路雖受大熱門雷神座騎「大步走」猛烈威脅，但末段仍能再加速，以半馬位之先打開在港勝門，亦見證史卓豐與葉楚航自舊年9月21日於谷草贏出「大寶庫」以來，近大半年內初次合作建功。
葉楚航說：「『榮冠大道』上場受阻，陣上際遇非常不利，今場排一檔有利，加上步速不太快，最開心是明天（6月1日）是此駒兩位馬主太太生日，今次贏馬正可為兩人賀壽，別具意義。」「榮冠大道」馬主正確登記為陳仲賢先生及夫人與葛創基先生及夫人，據知兩位太太是孖女。
今場「大步走」、「想贏就贏」分別跑第二及第三，第四名由「馬飛龍」拎到，四重彩派近三萬元。