戰友咖喱講今季四大聯賽怪現象，神射手都唔係嚟自冠軍隊，如果進攻唔係冠軍嘅最大元素，唔通防守就係？咁又未必，四大聯賽中，車路士同皇家馬德里兩支冠軍，失球都唔係聯賽最少，好似車仔為例，佢只係英超失球排名第三少，第一係熱刺，第二呢？曼聯，埋單計曼聯今季都只失29球。
西甲方面，皇馬更加離譜，失球數字只排聯賽第四少，馬體會、維拉利爾都失少過佢，最諷刺係亞軍巴塞隆拿，不論入球同失球，都優於皇馬㖭。
曼聯領隊摩連奴（圖），過去幫車仔贏過三次英超冠軍，仲破過單季只失15球嘅英超紀錄，當年長期買車仔贏1:0、2:0真係有錢執。但今季摩連奴想將鋼鐵防守移植至曼聯，單睇失球數字都成功，失波少過車仔四球，但失波引起失分問題就相當致命，紅魔鬼今季唔少比賽都係領先一球下，希望死守到尾，結果尾段失波搞到和局失分，曼聯單季和足15場，亦都係冠絕英超。
連擅長泊大巴嘅摩連奴今季都失威，證明科技同體力進步下，已經拉近強隊同弱隊距離，弱隊雖然整體實力未必及得上強隊，但可能唔使踢歐洲賽等有利條件下，對強隊前有多時間部署，就算全場死守，體力都未必耗盡，而且科技進步，要透過強隊過去比賽片段，分析對方漏洞，亦都較以前易入門，往往可以把握一、兩次機會，就成為搵到入球機會。
小弟唔敢講摩連奴過時，但以𠵱家嘅足球比賽，有一球領先甜頭，唔把握機會再入到兩、三粒所謂燕梳球，蝕底只係自己。
文：牽牛