只要大家落一轉旺角或深水埗遊戲店鋪，就會知道現時Nintendo Switch有幾好賣，難怪日前有消息指任天堂已決定增產，希望由現時至2018年3月底期間生產1,800萬部主機滿足市場需要。不過任天堂要增產並唔係想像咁容易，其中一個關鍵竟然是Apple！表面睇Nintendo Switch跟Apple在產品線上基本上無任何衝突，就算Nintendo Switch外表上似平板電腦，但用法上跟iPad又完全唔同，但Nintendo Switch同iPad或iPhone有好多零件都是相同。根據網站引述The Wall Street Journal報道，iPhone 7的持續需求跟即將推出的iPhone 8都令不少零件生產商「爆廠」，加上數據中心亦需要大量NAND記憶體，任天堂在尋求LCD顯示屏以及NAND記憶體供應方面都遇到問題，但若然任天堂要高價搶貨的話，將會令Nintendo Switch成本提升而導致虧損。到底任天堂會點樣平衡生產成本同增加產量呢？作為一個未買機的機迷，只希望Nintendo Switch可以用原價買得到，唔使再食貴幾十至一百元的炒價。
資料來源：BGR
記者：布偉倫
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily