今個星期日係六四事件28周年，當晚嘅維園會俾一班拒絕遺忘嘅港人用燭光照亮。當然啦，亦有曾經高舉燭光嘅人選擇忘記嘅！民主黨副主席羅健熙喺facebook上載前黨友馮煒光喺2009年出席南區區議會時嘅照片，令人「眼前一亮」，當日正正係6月4日，當時南區白鴿相約着上該黨設計嘅六四tee開會。羅健熙憶述，件衫馮煒光都有份設計，坦克圖案配上「h9b8」，反轉睇就係「8964」，寓意平反六四，係咪好有心思呢，但已經，俱往矣！
前黨友嘆人面全非
羅健熙搞乜要向馮煒光翻舊賬？佢話喎，原本諗住搵啲舊相，講吓利東邨或者南區人面全非嘅人與事，點知竟然搵到呢張「珍藏」，慨嘆講到人面全非，呢位仁兄一定上榜，佢仲話喎：「米蘭昆德拉說，人與強權的鬥爭，是記憶與遺忘的鬥爭。悼念或許沒有甚麼即時效果，但遺忘就甚麼都更不可能出現。」
眾所周知，𠵱家貴為日薪一萬蚊嘅新聞統籌專員馮煒光，返工最鍾意玩facebook，不時幫老細梁振英做打手，時而去前黨友facebook踩場，留言挑機或反駁，但羅健熙發現，佢呢個post暫時仲未見到馮煒光嘅「足迹」喎，點解呢？
八方順帶都想提一提，梁振英當年都發聲明譴責中共，但變身特首後嘅佢，對六四事件一直「唔評論」、「無補充」。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk