上月踏入25歲嘅吳若希，今年生日有寶貝女Giselle（乳名淼淼）陪佢慶祝，不時喺社交網分享近況嘅Jinny，通常只貼囡囡嘅側面或鬆郁矇相，唔想囡囡嘅正面樣曝光。不過，日前有朋友探完淼淼後，忍唔住喺Instagram分享咗小公主嘅真面目，令淼淼曝光。
Sammi探蘇康B
前晚吳若希回覆傳媒表示：「我個女實在太靚，我日日淨係得閒望住佢，已經唔得閒做其他嘢啦，只係好畀心機餵奶同喼弗。」囡囡面圓圓好可愛，五官似足老竇，吳若希呷晒醋咁話：「個嘴似我㗎！」噚日佢索性自己貼出全家福。
此外，蘇永康太太馮翠珊前晚帶B仔Jazz見「BIG FOUR太太團」，雷頌德老婆梁家玉貼合照上Ig留言讚：「Jazz超可愛，很乖乖！呢個媽媽好勁，自己一個帶BB出街，厲害！」不過被鄭秀文（Sammi）抱住嘅Jazz卻嘴扁扁，網民留言笑：「Auntie Mi抱到Jazz想哭咁！」
初為人母嘅盧頌之則貼出母女合照，留言求助：「一遞奶樽畀佢，啜一兩啖就頂番出嚟，之後狂喊，有冇媽咪可以解答吓？呢個無力感真係令到我好無力！」
撰文：馮仁昭
