隨住意甲喺過去周日落幕，今季歐洲主流聯賽玩晒，小弟同牽牛兄會藉呢個專欄總結一下過去一季嘅歐洲聯賽。睇番啲數據，今季歐洲聯賽有個怪現象，原來各大聯賽神射手都拎唔到冠軍！
喺NBA歷史上，得分王好少可以贏得總冠軍，而今季歐洲球壇亦似乎沾上咗呢個魔咒，各位神射手都拎唔到冠軍。
逐個同大家睇吓，好似英超神射手係哈利卡尼（圖），佢得到聯賽亞軍；西甲同意甲嘅神射手分別係美斯同埋迪斯高，佢哋兩個亦係聯賽亞軍。德甲方面，神射手奧巴美揚得到聯賽季軍。
四大聯賽以外，法甲神射手卡雲尼係亞軍，葡超神射手巴斯杜斯係季軍，俄超嘅史莫洛夫入波最多，但佢隊卡斯洛達只係第四位。小弟唔會妄下判斷，話高效射手冇鬼用。不過，入球點分散確係好重要。至於車路士、皇家馬德里同拜仁慕尼黑就係今季各自聯賽嘅冠軍，佢哋嘅球員雖然贏唔到神射手殊榮，但至少都有兩名球員打入聯賽射手榜嘅前八位。車路士有迪亞高哥斯達同夏薩特，拜仁有羅拔利雲度夫斯基同洛賓，而皇馬就係基斯坦奴朗拿度同艾華路莫拉達。
細細個睇意甲，到之後連主要嘅收費台都冇得播，對意甲嘅印象仲停留喺以前嗰陣，總覺得意甲注重戰術同防守，節奏慢，悶波較多。不過，從今季數據所見，意甲係最多入波睇嘅聯賽，反而大家認為快上快落嘅英超入波最少，都幾顛覆固有印象。
喺四大聯賽，今季意甲出現咗1,123個入波，場均有2.96個入波睇，排第二嘅係西甲，場均2.94球，第三嘅德甲場均2.87球，至於英超就以場均2.8球排尾。
文：咖喱