今晚（31日）跑泥地夜馬，90後騎師特別醒神，頭三場由兩位23歲騎師史卓豐與起孖的潘明輝瓜分勝利。到第四場四班泥地一哩，夥拍大摩馬房「靚加加」勝出的祈普敦，咁啱都係呢個年紀，即是話上半場由23歲騎師贏晒。而「靚加加」單Win及組合獨贏A1分別派68及36.5元。
由長腿年輕女馬主史佩加持有的「靚加加」，出自2016年香港馬匹拍賣會，身價350萬港元，本身之前出賽十次零上名，但三度跑第四。今場「靚加加」重配之前騎過跑第四的祈普敦，初戴羊毛面箍上陣，陣上從第1檔起步，沿途守三四位，末段移入內欄以勁勢追過一度突圍的「都靈明珠」，贏一頭位打開服役勝利之門。
大摩說：「『靚加加』跑至第十一場才交出頭馬，令我非常失望，牠是一匹很難贏的馬，今場在泥地終於取得突破，除了一檔形勢好外，祈普敦出色的發揮也應記一功。『都靈明珠』差點封了『靚加加』的位，好彩祈普敦奮力策騎到底，騎師發揮出色。」
反觀隸屬何良馬房的「都靈明珠」負133頂磅在郭能胯下，拼盡都只能屈居亞軍，未能實現季內第二捷。三、四名分別為大熱門「五星特工」及「百威特務」，四重彩派六萬三千幾。當中季軍「五星特工」係雷神這晚暫時出賽四駒中的第三匹上名馬，佢跑罷上半場仲未有馬贏。