她曾是《鹿鼎記》的可愛郡主沐劍屏。
亦曾是《真情》內劉愷威的女友。
42歲的鄺文珣在十多年前告別幕前，結婚息影湊兩個仔。今年意外陀上第三胎，曾一度作小產，四個月身孕仍瘦得只有109磅。但她感恩再有機會做媽咪，「只要想像到佢出嚟時，好得意，好似小麵粉咁，我再養肥佢，就幾辛苦都值得。」
老套都要講，媽媽真的很偉大！
採訪：林妙萍
攝影：郭賢興
化妝：Momo Chow@嫁妝
服裝提供：Shiatzy Chen
場地提供：DALLOYAU Le Cafe
鄺文珣2002年退出娛樂圈，2006年嫁給商人老公應德榮，婚後很少接受訪問，主力湊現時八歲大仔Cadence、六歲二仔Casper，今年開始復出做一些慈善工作，卻又意外懷上第三胎，更曾作小產。
旅行作小產
42歲的鄺文珣現時陀B四個多月，訪問做到一半，頭暈氣虛要停下休息，難以想像，她原來只有109磅！「上星期去磅時，自己都surprise，只得109磅，我陀上兩個時，到𠵱家呢個階段，係差不多130磅，所以真係要慢慢增長番先得。」她最慶幸是腹中嬰兒健康成長，「BB好健康，頭圍、大髀骨都正常，手手腳腳、手指仔都喺齊到。」
消瘦不少，因鄺文珣初期低估了陀第三胎的體力負擔，初孕時一家四口去日本旅行，中途作小產，「我有兩胎經驗，呢胎就唔係咁緊張，但去到日本時個情況係越來越差，行得多，有少少作小產。」回港後妊娠反應更強勁，令她氣虛暴瘦，「大約兩個幾月時間，胃口好差，唔想食，幾乎唔會落床，唔想出房，因為根本冇力。嚴重到係我唔可以聽到『餐廳』呢個字，『食物』啦，『日本』呢啲字，就算見到人哋fb嘅日本風景相，都要好快loop咗去。」當時吃得下的只有某間餐廳的白汁意粉，所以變了飯堂，老公更為她學煮意粉。
擇日開刀生
「幾辛苦都值得，只要想像到佢出嚟時係好得意！」鄺文珣一講到肚裏的BB，眼睛即發光，「點解我要叫佢小麵粉，因為覺得佢好似米芝蓮車呔人咁，好多肉，等佢出世，慢慢養肥佢。好感恩，可以有多一次機會，畀我重新感受由懷孕到湊BB長大。」她會和上兩胎一樣，擇日子開刀生產。
三個夠晒數？鄺文珣陀B辛苦，卻計劃多多，之前為孤兒助養的「海星計劃」寫歌、表演籌款，亦想出書分享家庭育兒、夫妻相處心得。「因為第三胎，老公嘅心態有少少唔同，好支持我，叫我做番一啲自己想做、鍾意做嘅事，老公係思想型，佢會講到一啲好深層次嘅嘢畀我聽，喺佢身上，我學到好多嘢。」
真係有戲癮
拍劇？「我成日都有諗住，可能因為呢份真係我最長嘅工作，真係會有戲癮，但當然要睇自己嘅身體狀況、時間咁。」卧床養胎期間煲劇打發時間，美劇、韓劇、內地劇都有，當然，少不了前娘家TVB的出品，「早排唔舒服時，我睇洪永城做嗰套《我瞞結婚了》，好輕鬆，睇得我瞓床日子冇咁苦悶。」
家庭樂樂
鄺文珣一家四口（就快五口）親子活動之一，就是全家夾band。她在加拿大約克大學音樂系畢業，息影前曾在台灣出唱片，間中都會作曲自娛。現時大仔Cadence學大提琴，「佢鍾意音樂，有啲天份，但練琴會好悶，我有時會用鋼琴伴佢，好似一齊彈咁。我哋成日好似打band咁，爹哋就唱歌，細佬就會問：『我個shaker呢？我個shaker呢？』用音樂溝通。」
不想做怪獸家長，鄺文珣希望囝囝學樂器不要輕易放棄，「佢哋學緊三樣嘢，游水、踢波同樂器，都係佢哋鍾意嘅活動。」
更多精采時尚內容，盡在 http://add.appledaily.com 。