為期兩星期嘅第三屆香港博物館節喺6月24日開鑼，除咗近百項文化活動，仲有兩個同北京故宮有關嘅重量級展覽。7月2號開始歷史博物館就有「萬壽載德——清宮帝后誕辰慶典」，超過210年文物，話你知清代帝皇家係點擺大壽，重點展品有乾隆送畀阿媽做大壽嘅「蘭殿延禧」長卷第4卷，畫出大壽時由西郊別苑去到紫禁城沿途景色，4卷畫足足畫咗10年先完成。
而藝術館策劃嘅「八代帝居——故宮養心殿文物展」就會喺6月29號喺文化博物館舉行，趁故宮養心殿維修，借咗230幾件文物嚟香港，搭成3個1：1場境，重現呢座歷經八代帝王嘅「home office」原貌。其中乾隆書房「三希堂」仲整咗個複製品，畀公眾可以瞓喺龍床上面selfie。
康文署今次會喺活動第一同最後一日安排免費穿梭巴士，仲同廣東及澳門兩地博物館聯手宣傳，推動區域文化旅遊，希望吸引到30萬人次參觀。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk