歐聯大戰前，祖雲達斯戰術核心喺慈善賽拉傷！唔係保羅戴巴拿傷咗啩？唔好同我講係保方受傷咁大鑊！各位斑馬迷放心，雖然呢位祖記核心人物拉傷咗，但唔會影響到球隊喺歐聯嘅戰鬥力，因為受傷嘅係教練艾基利。
禮拜二喺都靈有場慈善賽，除咗艾基利有份之外，唔少祖記名宿有份參加，包括迪比亞路、尼維特同戴維斯，另外咗仲邀請咗兩位法拉利嘅F1車手拉高倫同維特爾嚟踢，真係星光熠熠。49歲嘅艾基利唔太好彩，踢咗15分鐘左右，就自己拉傷咗右大腿，要退下火線。佢都覺得好欷歔，「只係小小拉傷，唔太嚴重，呢晚嘅比賽非常精采，最緊要幫到有需要嘅人。不過，我就唔係太好彩。你可以對抗所有嘢，但點都冇得返老還童。」呢場慈善賽，44歲嘅尼維特仲好搶鏡，入咗球靚遠射，而客串踢波嘅拉高倫腳風好順，大演帽子戲法！雖然艾基利拉傷咗，但佢話唔算嚴重，同埋佢係教練，最緊要係食腦，做好排陣同戰術應變就可以，相信唔會影響到祖記喺周六歐聯決賽嘅戰鬥力。
巴利冇正選都唔驚訝
至於祖記決賽對手皇家馬德里喺周二操練，兩大主力都復操，包括翼鋒加里夫巴利同埋右閘丹尼爾卡華積，所以皇馬周末可以「夫添」出戰。不過，巴利話自己可能冇90分鐘嘅體能，「我唔知邊個踢正選，我無論正選定後備都冇問題。如果我冇正選甚至連上陣機會都冇，我亦可以理解。今季我一波三折，好多傷病，我可能踢唔到90分鐘比賽。」傳媒好關心皇馬會派巴利定艾斯高擔正，教練施丹亦賣關子唔肯講。
皇馬球星基斯坦奴朗拿度（C朗、右）女友佐真娜（左）嘅身材一向好fit，唔係有咗，又點會有咁大個肚腩！西媒仲話，佐真娜呢次係陀孖胎。如果係真的話，真係恭喜晒C朗！互聯網
