賓架P召集嘅中大校友中午飯局，十幾年來都在南華大廈香港華商銀行公會舉行，幾個月前因更換飲食營運公司，進行大裝修，於是改往安樂園大廈嶺南會所吃飯，中貿林係嶺南會所常客，幾乎係佢飯堂，日夜在此吃飯；會所係嶺南機構所有，會員多是嶺南大學、嶺南中學成員，有幾十年歷史，食物並非特別精緻，屬住家餸菜型，勝在夠實在，價錢相宜，好適合打工仔女食番餐，諸多要求者就唔好上去挑剔咯，水準其實係高過裝修前嘅華商銀行公會（以下簡稱銀公會）嘅。
呢日係飯局之期，左丁山走上嶺南會所，咦，冇人嘅，啲夥計真醒目，特別通知：「銀公會開番咯噃，P先生可能去咗嗰邊！乜冇通知你咩？」係噃，連忙撲去南華大廈，上到五樓一望，哦，裝修大翻新，完全唔同晒，私人房冇咗，只見六七位師兄弟已坐在老位置嗰邊，P先生話：「以後飯局重返銀公會。」問吓夥計，銀公會飲食現由玉桃軒集團承辦，連鎖飲食店，望吓餐單，六菜一湯加甜品，收1,500元全包，又幾OK噃，可惜上菜慢幾拍，一時半過後先至上菜，夥計陪笑曰：「新開張還是磨合期」，幾識講嘢，但如果以後還是如此，阻住下午返工，有校友提議，走去嶺南會所好過。還好，食物質素幾好，勝過以前半籌，可以再俾機會佢。
賓架T望吓周圍，發現坐在我地四周嘅，有五張枱，共二十幾人，全是女士，不禁笑曰：「銀行職員冇男士嘅咩？」左丁山就覺得此現象實屬平常，中環中午吃飯，去邊間餐館都係女食客佔六七成（陸羽除外）嘅啦，依家白領階級中，OL佔多數，中高層白領職位，女士更佔多數，賓架P升做銀行經理之時，銀行界好少女士擔任高職，現在呢，恒生、匯豐、渣打、中信銀行皆是女士做CEO，可見銀行界已逐漸成為女性天下，未來20年，男士勢力在中環日益萎縮，可以斷言！年青校友A就話：「未必啩，東亞、恒生等銀行有飯堂，職員吃飯免費，新世界大廈亦有新世界周大福飯堂，男職員每日在飯堂吃飯，慳番好多㗎！」東亞飯堂亦提供早餐，每位收費唔使十蚊，男職員儲老婆本，供樓首期，最啱晨早返工，足不出戶吃過飽！
呢排金管局連施辣招，逼銀行提高按揭息口，在壓力之下，各銀行已加息十點子（十分之一厘），賓架T話：「加十點子，可能未滿足金管局胃口，但既然壓力初步有效，不排除金管局繼續調高按揭嘅風險權重，繼續迫使銀行加按息！」又係嗰句，干預市場逼地產商發達！