凡事都有第一次！外號「火車」的新紮見習騎師潘明輝，這晚（31日）第一次跑沙田泥地夜賽，佢於第二場五班泥地1800米，首度策騎姚本輝馬房「好性格」，錄得個人泥地夜馬第一Win。「好性格」大熱開齋，單Win及組合獨贏A2分別派36及21.5元。
四歲澳洲自購新馬「好性格」之前14戰只得一季未開齋，呢次出爭之前跑過第三的五班泥地1800米，換上有十磅減的潘明輝，兼且除眼罩、除頭罩、初戴耳塞、初戴開縫眼罩及繼續戴交叉鼻箍，配備變動多多，早段帶放，中段退至三至五位，末段重新再上，於中叠排眾而前，力壓於其外側如飛殺上的「糖黐豆」，「好性格」贏一頭位成功打破服役齋缽，亦助潘明輝首度替姚本輝馬房建功。
姚本輝說：「我覺得搵十磅仔潘明輝好過搵雷神，雷神有時唔會回覆我，但潘明輝師傅賀賢一定會有答覆，賀賢還會為潘明輝揀選合適座騎。我三周前已搵定賀賢，卜定其徒弟為『好性格』主轡，此馬泥地性能很好，加上曾在泥地千八米上名，所以一早部署跑今場，如今贏馬後我又會卜定潘明輝稍後騎我的馬，我認為這位後生仔的騎功認真唔錯呢。」
現年23歲的潘明輝至今在港上陣七個賽日均有馬贏未斷纜，惟因早前誤服藥物，佢周日（6月4日）要停賽一次。
第二場二至四名分別為「糖黐豆」、「友歡笑」及「幸運神駒」，四重彩派三萬二千幾。