「我現在一間大企業工作，公司福利很好，花紅每年豐厚。但我的工作，其實是為老闆的「老臣子」執手尾。那個老臣子在公司做了幾世紀，典型老seafood，簡單英文email都話睇唔明，做所有事都係錯漏百出，根本無條件轉工。所以當然要靠擦鞋技倆保住飯碗。老臣子所有紅日假期包括大假全部不放，日日遲收工扮勤力，我老闆不知幾buy，認為所有下屬應該學老臣子一樣「瞓身」，我頂唔順想轉工。但（1）難搵到咁高人工嘅工，（2）怕自己會後悔quit一份咁stable 嘅工。」
針係永遠冇兩頭利，如果你怕離開一份薪高糧準的穩定工作會後悔，不是應該疊埋心水默默低頭繼續你的執手尾工作？一切人工包埋的嘛，怎麼滿腹牢騷，咁多唔順眼唔順氣？老臣子是甚麼人？憑甚麼可以不學無術做多錯多依然屹立不倒？你又不是看不穿，一份穩定又安定又人工高的工作，今時今日邊度搵？只要你肯學安分守己做好你的執手尾工作，學習老臣子投老闆所好擦其鞋，日以繼夜夜以繼日瞓身賣命，只要你夠長命，捱得到他退休，絕對有機會取而代之做繼任人。
其實條數非常易計，為一份世間難求的「筍工」，當然要付出不一樣的代價，如果覺得值得，就無需庸人自擾。如果覺得自己值得更好，希望自己的能力實力得到表現的機會，都無需猶豫馬上搵工跳槽，找一份為自己買命的工作。貪圖安逸，為求兩餐安樂茶飯，我沒有資格說對錯，我只想問你貪圖的所謂安逸，是不是真的安逸？你的茶飯，真的安樂？居安要思危，何況你根本居不安？鐵達尼都會沉船，你還相信有金飯碗的存在嗎？舒適圈，是溫水煮蛙，悲慘下場不是命運，是選擇！
張慧敏
http://www.facebook.com/HKcareerdoctor
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk