雖然由副局長升呢至揸莊，但據聞新一屆嘅林鄭班子，冇留一席畀替補張建宗嘅勞工及福利局局長蕭偉強，即將離開熱廚房嘅佢非常輕鬆，噚日為扶康會舉行嘅電能烹飪比賽主禮，就可以置身事外，唔使入「熱廚房」落場顯身手，仲透露7.1後大計，先去日本遊一圈，返嚟日日要去書展打書釘。咦，呢啲活動係教育局局長吳克儉嘅至愛喎，唔知兩位卸任局長會唔會相約出動呢？
「唔知你哋頂唔頂得順？」
噚日個烹飪比賽，主要係由多名立會議員展身手，而蕭偉強主禮完就先行離開，佢致辭時笑言：「多謝各立法會議員願意走入熱廚房，唔知你哋頂唔頂得順？」佢仲叫在場評判盡情批評議員嘅廚藝，因為冇乜咁嘅機會；雖然告別在即，但自己之後仲要去立法會接受議員質詢，所以唔多評論，認真鬼馬！
蕭偉強透露7月上旬會去日本旅遊，仲話有個願望，相信今年可以實現，就係書展期間日日去打書釘，聽吓講座同參加工作坊等。佢話近年去書展嘅時間越嚟越短，自爆間屋有兩間房擺書同影碟，好多都未睇，之後應該會有時間「解決」佢哋。至於勞福局至今仲有標時、取消強積金對沖等議題仲拗緊，佢話會就標時政策方向、處理對沖進度等繼續努力喎。
講番個比賽，田北辰、張超雄、麥美娟、林卓廷、郭家麒、容海恩等同智障人士組隊煮齋菜之外，仲有呢個活動嘅常客、即係前立法會主席曾鈺成，曾太仲喺現場「蜜蜜」為老公影相留念。
八方目測眾人廚藝真係好一般，有啲雞手鴨腳，有啲有姿勢卻未見有實際，評判甚至試食時面容扭曲，味道如何就唔使多講，當然推廣傷健共融，最緊要都係有心。最終名人賽由田北辰隊伍摘金，郭家麒嗰隊就拎大獎。田二少其後喺fb話，至此先發現自己原來有啲烹飪天份，仲興奮到錫錫獎盃。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk