有「比堅尼航空」之稱的越南廉航越捷航空（VietJet Air），今年3月啱啱喺當地上市，估唔到咁快就再有計劃衝出海外，仲點名香港係其中一個考慮地點！越捷創辦人兼行政總裁Nguyen Thi Phuong Thao，近日接受外電訪問時候就話，希望再去其他地方上市，倫敦、香港和新加坡嘅交易所都已經向佢哋表達咗有興趣，今個星期公司仲會同紐交所職員見面，講到好似唔憂嫁咁款。
行比堅尼Catwalk遭罰錢
其實呢間航空公司最鍾意搞噱頭，試過喺飛機行比堅尼Catwalk，搞到俾政府罰錢，舊年又推出比堅尼女郎月曆，認真出位。管理層夠晒雄心壯志，Thao不諱言：「我哋冇打算掩蓋呢個欲望—希望成為首間在海外上市的越南公司！」
查實舊年中秋，越捷航空都嚟過香港搞活動，公佈開辦首條來往香港和胡志明市的航線。之不過，記者會上就唔見公司最煞食嘅招牌，個個空姐都着得非常密實，橙色恤衫配格仔紋空姐帽，仲要着短褲㖭，真係令到香港唔少網民大為失望。如果越捷真係嚟香港上市，作為公司最廣為人知的標誌，上市儀式唔可以冇比堅尼空姐啦啩？
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk