今日25歲生日嘅香港泳壇「美人魚」歐鎧淳（Stephanie），大方得體贏掌聲！事緣Stephanie早前為一間餐廳拍攝微電影廣告，其中一幕畫面係當佢以3分27秒掂池時獲得隊友興奮歡呼鼓勵，結果引來網媒博客撰文，並以隊友何詩蓓嘅200米自由泳港績同港隊4x100自接力時間作比較，批評Stephanie甘心俾導演、編劇等侮辱專業。
Stephanie今日就喺fb以「千字文」詳細解釋，指3分27秒「係我練短池十個三百自嘅平均目標時間。每一個訓練都有佢嘅目的，至於片中點解係三百唔係四百；第一係令訓練有多一啲變化，第二可以延長高速度嘅時間。」佢亦重申所謂「拋頭露面」係希望令大家見到更多運動員身影：「我相信只要畀機會佢哋，就會有多樣性嘅發展可能。」最後亦感謝對方願意用運動角度嚟評價：「至少他仔細在意過我游泳成績，還會翻查紀錄，代表有人慢慢嘗試真正了解體育。」貼文短短出街9小時，已經獲得超過2,500個likes同love，證明Stephanie嘅得體回應贏得網民認同！