英冠升班附加賽決賽周一喺溫布萊上演，哈特斯菲爾德同雷丁踢足120分鐘都係0:0，要互射12碼決勝，最終由哈特斯菲爾德以4:3勝出，成功升上英超兼最少袋1.7億鎊（約17億港元）獎金。雖然球會一朝暴發，但哈軍都算有良心，來季成人季票只售199鎊（約1,990港元），連續九季或以上季票持有者更享有半價優惠，即係一張「金牛」就可睇足全季主場英超！
互射12碼贏雷丁4:3
哈特斯菲爾德對雷丁呢場升班附加賽決賽，兩隊踢足120分鐘都係0:0，喺互射12碼時，哈軍有後衞米高希菲利「宴客」，但雷丁有李安摩亞同埋佐敦奧比達射失，結果哈軍以4:3勝出，升上英超。家陣每次介紹哈軍領隊華拿，少不免提吓佢係利物浦主帥高路普嘅死黨、同房兼伴郎，而喺球隊成功升班之後，45歲嘅華拿亦即刻「有事相求」，希望高路普可以繼續借升班功臣之一嘅門將丹尼禾特畀哈軍，唔知高路普肯唔肯答應呢？
譚拔士X教授都捧場
其實，哈軍除咗領隊有名氣外，仲有唔少星級球迷，好似電影《變種特攻》入面嘅X教授柏德烈史釗活（Patrick Stewart）就係哈軍嘅忠粉，佢都有去睇呢場波，仲話到咗互射12碼時，幾乎緊張到唔敢睇。哈軍亦係昔日香港聯賽射手兼本報名家譚拔士嘅母會，下季譚拔士喺本報相信有好多哈軍嘅好料提供！
哈軍雖有1.7億袋袋平安，但按照佢哋喺三月公佈嘅17,000張來季季票定價，成人季票只售199英鎊（約1,990港元），連續九季或以上季票持有者更享有半價優惠，哈軍稱得上係英超「良心」！
噚晚喺溫布萊觀戰嘅前哈軍前鋒譚拔士表示，兩季前哈軍主場球迷下跌到10,000至12,000人，球會決定推出較平季票吸引球迷，保證下季維持200鎊季票票價以答謝球迷，「領隊華拿已表明新季會有多名新球員加盟，當中包括繼續喺德甲借用合適球員。」至於曾經喺哈軍跟操嘅吳偉超都好興奮，佢話：「哈特斯菲爾德其實好少人，但每逢佢哋主場賽事都會有萬幾二萬球迷，好多一家大細入場。佢哋個主場同波衫都冇乜變。」