巴塞隆拿周一正式公佈新任教練人選，由前畢爾包教練華維迪接手，呢位53歲教頭球員時期就踢過巴塞，有巴塞DNA，不過管理層就唔多信佢住，只畀兩年死約同一年生約佢。
比較過往巴塞名帥，好似哥迪奧拿、安歷基等，華維迪喺球員同教練時代都唔算太出名，球員時期幫巴塞贏過西班牙盃；做教練時以帶奧林比亞高斯最威，贏過希臘聯賽冠軍；教畢爾包最叻贏西超盃，因為畢爾包傳統上要用巴斯克球員，唔可以用外援，所以佢都帶起唔少畢爾包新星，都切合巴塞重視青訓嘅目標。巴塞主席巴杜美就話：「華維迪有能力，有經驗，有知識，佢亦善於提拔年輕球員，會帶巴塞成功。」華維迪將於周四正式到魯營出席記者會，仲會首度帶隊練習𠻹。
講起新帥，巴塞隊長恩尼斯達就當然有讚無彈，佢話一向都好鍾意華維迪，佢帶波成績都唔錯，好期待同佢合作。