無綫劇集其中一條方程式，叫做碌樓梯。
角色失足碌落樓梯嘅機會，基本上，喺大台劇集而言，同角色爭執之間混亂中唔知邊搵到把生果刀，然後發生悲劇。
就連被奉為神劇嘅《天與地》，亦不能免俗，鼓佬林保怡最後都係失足碌樓梯，撞柱而死。
最新被安排碌樓梯嘅演員，係陰謀情人鄭子誠……佢今次，係同人嗌交，推拉之間失足碌咗落去…碌咗三次。因為呢個鏡頭拍咗三次。
有「西友」前日喺fb群組「西環變幻時」貼咗呢條片，寫住：「鄭子誠堅碌落去，睇到都痛」。拍攝地點係西環七台之一嘅太白台。
條片好簡單，只見鄭子誠同田蕊妮拉扯間———其實主要都係佢拉住個女嘅，然後自己就差錯腳碌咗落去。碌嗰下，鄭子誠仲係成個「大」字形咁，好誇張一嘢飛落去。一著地嗰下，雙手及時撐地，保住塊面唔好受傷，之後就成個連爬帶滾繼續跌落去。
碌碌碌碌碌碌，落地嗰下，連墊都冇。雖然話個身墊咗pad，但頭同面都好緊要㗎…企喺一邊嘅龔嘉欣嚇到成個呆咗。
有網民係咁話好治癒，loop咗好多次睇完又睇，亦有人話好戥陰謀情人肉痛，感歎做演員不易……但亦有眼利嘅網民發現，呢位陰謀情人，應該係替身，加咗墊，所以比真人亦大隻咗啲。
大家議論紛紛，不少西友原來咁啱都喺現場，有人仲貼咗條兩條「碌落去前傳」，係真嘅鄭子誠拍跌落地嗰下踲嘅補shot，梯級仲舖埋墊，有工作人員掹實。鄭子誠只需要做番碌落去之前同田蕊妮嘅拉扯動作大頭，同跌落去嗰下「哎呀！」慘叫就OK。其他動作就交由專業替身負責。
網民就咁講：「隔住mon見到都痛！辛苦晒！」、「飛起身嗰下太誇張」、「真係佩服！專業！」、「呢度樓梯咁高，真係碌落去都危險。」
咁多留言，point中之point，係呢句：「抹晒啲狗屎」…拍片者即回覆 ：「街坊嚟喎！」
鄭子誠昨日回覆傳媒時，都勁讚替身好專業，佢短訊回覆話﹕「Take咗5、6次...面不改容...超專業，萬二分致敬！！」