有時睇頒獎禮，見到啲名人堂或者終身成就獎好似分豬肉咁，咪話唔兒戲，但德甲班霸拜仁慕尼黑呢個名人堂就絕對唔易入！33歲嘅拿姆早前喺德甲煞科戰完成第517次為拜仁披甲後功成身退，周一再次回到拜仁接受加冕，成為歷來第17位名人堂成員，同碧根鮑華、武勒、馬圖斯、艾芬保等齊名，對上一位躋身名人堂嘅球員已經係2008年嘅門將簡尼，絕對係含金量十足！
拿姆周一喺球會博物館出席揭幕儀式，更獲球會頒發「紅夾克」加身，佢坦言對於9日前「Last Day」仍然念念不忘：「嗰個星期六對我嚟講實在太感動，呢個last day永遠喺我回憶佔一席位。」行政總裁路明尼加同球會主席漢尼斯亦不吝讚美之辭，大讚拿姆絕對值得入選。