為咗宣傳嚟緊喺中國嘅季前熱身賽，阿仙奴十分識do，喺官方Facebook上載咗一條球員扒龍舟嘅短片，祝大家端午節快樂。不過，大家唔好誤會山神同奧斯爾等真係出海扒龍舟，只係揸住槳扮吓樣咁，後面就係有海有浪嘅電腦佈景板，山神仲打埋鼓㖭！而官方微博，就當然打埋喺上海約戰拜仁慕尼黑同北京鬥車路士呢兩場季前賽嘅資料，希望槍迷到時可以現場助威，支持「乘風破浪的兵工廠龍舟隊」咁話喎。
不過我求大俠就認真唔好心地，事關老一輩有句歇後語：番鬼佬扒龍舟，倒數第一，對阿仙奴嚟講就真係唔多老利；周二又傳來消息，對希望改革嘅廠迷就真係涼了一截，據BBC報道，領隊雲格同大股東高安基周一見完面，高安基隨即喺周二嘅董事會中提出，向雲格提供兩年新約，最快今日就會同雲格簽約落實。雲格已經執教阿仙奴21年，但自04年後已經未嘗英超冠軍，今季更加跌出前四，雖然最尾擊敗車路士，捧番個英足盃，但不論英國國內或海外，要求雲格離隊嘅聲音不絕，睇吓今次雲格續約，會唔會引發新一輪反雲示威。