周潤發近年開工拍電影，都會畀錢叫工作人員幫佢整個流動小食攤檔「發記士多」，免費提供小食畀現場所有工作人員。呢排拍緊莊文強執導嘅《無雙》，因為端午節，所以發記士多派咗唔少糭應節，而呢啲靚糭，除咗係發哥發嫂自己買之外，原來有啲係九龍城街坊送畀佢哋食，佢兩公婆就一於攞返片場分甘同味。
梁健平讚窩心
有份拍呢套戲嘅梁健平都受惠，仲喺facebook貼咗張糭嘅相多謝發哥：「多謝周氏伉儷的糭，多謝發記士多，太有節日氣氛了，辛苦寶姐和May姐，感恩。」問番梁健平，佢話端午節之前，發嫂買咗好多糭派畀工作人員：「發嫂派糭，個個都有，真係覺得好窩心，發哥發嫂做到咁極至，真係唔知講乜好啦。不過我都要好小心飲食至得，因為咁好伙食，好容易食肥。」如果一早拎咗糭又咁啱埋位冇時間食點算？發記士多主理人May姐會即席烚糭畀大家食，好周到！
噚日端午節，全個劇組放假一日，發哥就可以喺屋企休息吓，跟住劇組就要拉隊去加拿大同泰國拍外景，聽聞就算去到外地，發哥都堅持保留發記士多。
撰文：馮仁昭
