譚仔雲南米線早前被日本丸龜睇中,飲食股一度成為熱門話題。最近就有一隻富二代打骰嘅「米芝蓮」飲食股佳民集團,再次話要申請創業板上市,背後股東大有來頭,核心股東黃佩茵就係金山工業(040)老闆羅仲榮的新抱,仲有新世界(017)主席鄭家純女婿龐建貽,同埋中港照相(1123)太子爺孫道弘,都係股東之一。
眼見一班富二代圍埋搞飲食,就估到佳民走嘅一定係高檔路線,旗下有10間餐廳,有唔同品牌及菜式,包括有「米芝蓮二星」嘅中環都爹利會館,人均消費就超過500元。但相比平民嘅譚仔,一班富二代做高檔飲食業可以話輸譚仔九條街!
譚仔一年收入達7億元,純利超過7000萬元,而佳民2015年同2016年收入只係得2.065億元同2.324億元,重要蝕住上市,兩年分別蝕460萬元及950萬元,10間餐廳之中有6間都仲未回本嘅。
而要留意返嘅係,核心股東黃佩茵的老公羅揚傑,同埋「純官」女婿龐建貽,其實都已經係另一間上市飲食股Classified(8232)既股東,分別各自持有19%權益,早排公司業績仲蝕緊錢。明明兩間公司業務相同,股東又重疊,咁樣上市似乎有利益衝突喎!佳民係上市文件中就強調,羅、黃兩公婆持有嘅兩間公司,係獨立發展嘅,目標客唔同、互相競爭有限咁話。但兩公婆真係可以分得咁清架咩?我就唔係太信喇。
97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk