前高球一哥、14次大滿貫冠軍老虎活士真係一沉百踩，受婚外情兼召妓醜聞困擾，加上受長期傷患影響，戰績已不大如前；不過佢仲係唔生性，周一凌晨因醉駕被捕，被拘留八個鐘先獲警方放人。活士之後雖然發道歉聲明，但強調冇飲酒，只係「服用處方藥物後產生出乎意料嘅反應」，其實藥駕同醉駕一樣害人害己，老虎唔好死撐喇！
周一凌晨大約三點，美國佛羅里達州警方喺活士屋企附近截停佢架車，警方發現佢疑似飲咗酒，所以就帶佢返警局調查，搞到朝早10點幾先放人；佢被捕嗰陣影嘅相都流出埋，面容憔悴，眼袋仲大大個。之後，活士發聲明唔認醉駕，話係因混合服用醫生處方藥物嘅副作用反應太強，導致揸車受影響；但佢都明白事件嘅嚴重性，表示願承擔責任，仲向家人朋友同球迷道歉。
活士近年衰完一鑊又一鑊，有指今次事件後可能又有唔少贊助商離棄佢。據娛樂網站TMZ報道，活士現任女友姬絲汀知道佢被捕後，反應都好爆，姬絲汀喺達拉斯「濕平」嗰陣知道件事就大喊大叫，喊完之後，就豪使咗5,000美金（約39,000港元）買嘢，唔通呢啲就係購物療法？