大有機會贏得本屆「告東尼獎」(最佳成績本地騎師)的華將梁家俊，這天端午節假期有到場操馬，共試了兩駒，包括容天鵬馬房的無賽程馬「大聚會」及蘇保羅旗下的「嘉應之友」。
「嘉應之友」列陣周三晚(31日)沙田第七場二班1650米泥地，排8檔起步，此駒已經係四日內由家俊仔第三度親操，明顯非常重視呢匹賽駒，而「嘉應之友」走起來亦步伐輕爽，神色活潑，狀態甚佳。
五歲的「嘉應之友」雖然已經年幾冇贏過，但佢嘅戰鬥力同級數，絕對毋須懷疑。呢匹馬近4仗全上名，包括大前仗正正係配家俊仔，於同程二班泥地一哩得亞軍，表現好有根據。
其實「嘉應之友」仍留在二班，真係令人費解，此駒上季1400米贏馬之役，亞軍係今季兩勝國際一級賽的「喜蓮獎星」，而跑第三就係應屆香港盃亞軍「天才」，甚至已故四歲三冠王「佳龍駒」，嗰場亦輸給「嘉應之友」只得第七名。咁你話只五歲的「嘉應之友」目前只居二班，係咪一隻「優質股」先？一旦進度重拾正軌，睇怕可以橫掃！