今年47歲陳淑蘭(蘭子)，當年挾着88年港姐亞軍名銜，更喺最上鏡小姐一獎中，撼贏同屆冠軍李嘉欣，可惜港姐光環未有為蘭子喺演藝事業上更上一層樓，演戲拍劇大多徘徊喺大癲大肺之流嘅角色。
相反，蘭子感情生活多姿多采。緋聞男友名單中，除咗有天王、型佬，亦有漫畫家同富二代，每段感情全程投入，可惜蘭子至今仍未上岸，情路滿佈崎嶇。
黎明
91年，蘭子獲邀為黎明MV《對不起 我愛你》做女主角，兩人因而結緣，年前蘭子接受有線娛樂台訪問，自爆兩人曾發展地下情，但之後又反口話自己只係單戀黎明。
方中信
92年，蘭子同方中信拍劇撻着，93年兩人開始同居，直至96年有指莫可欣介入而分手。當年有報道指蘭子一次同莫可欣冤家路窄撞到正，有人一時控制唔住，掌摑莫可欣。02年，方中信接受《蘋果》獨家專訪時，重提莫可欣捱摑事件，佢就話：「我知，呢啲係包容，雖然佢（可欣）唔靚，但人品OK，呢方面人夾人緣。」
祈文傑
96年蘭子情傾祈文傑，女方自爆為追祈文杰狂惡補漫畫，但相戀兩年二人因性格不合分開，直至00年蘭子認識圈外工程師男友William，有傳蘭子因難捨舊愛祈文傑，最終同William分手。
利承武
07年，蘭子搭上希慎後人利承武，期間有傳女方逼婚不遂自殺，之後二人喺香港仔壽山村道男方寓所「吵大鑊」，疑因聲浪問題惹嚟一名外籍男鄰居不滿，最終驚動警方。不過事後蘭子堅稱絕無此事，最後二人亦因性格不合分手收場。事後有傳蘭子同利承武曾經有段短暫時間復合，惜最終感情無疾而終。