信義玻璃（868）同福耀玻璃（3606）係行家，只不過信義喺汽車玻璃市場佔有率同規模不及福耀高。福耀早於2011年開始海外設廠，一早進入收成期，至於信義？2015年先選擇喺馬來西亞擴建新廠房，未來新產能主要喺馬來西亞，當地天然氣價格遠低於內地，工資成本喺自動化生產模式下影響唔大，運輸往東盟國家嘅成本則下降，地價亦低，圍返成條數，成本可以慳得到。
信義收入年增長平均約一成，新產能絕大部份來自馬來西亞，即係未來新增嘅收入，都會享有較高毛利率，當然亦要視乎原材料同玻璃產品價格走勢。2016年至今，浮法玻璃行業基本因素走出谷底，未來好起上嚟，隨時產品價格升、成本同時下跌，盈利大幅增長。
信義似乎重覆緊福耀海外生產降低成本Formula，而以福耀情況計，慳成本因素可以至少持續幾年，令盈利增長變得更smooth更平穩。
信義玻璃歷史市盈率只得9.2倍，同福耀比較，折讓五成都有。近期信義走勢比福耀更強，值得尊重，其實剩係追落後＋重估因素睇怕有排玩。因此，如無意外，信義玻璃會係小弟年內重點股份之一。
晉佳
http://www.fb.com/advanceguy1
本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk