馬德里體育會下季會用新球場，原本主場卡達朗球場，用埋今季就告別球迷，不過唔好以為西甲煞科，上周六仲舉辦埋西班牙盃決賽，卡達朗就完成歷史任務，周日踢埋場慈善賽先正式告別。
呢場慈善賽由馬體會、世界明星隊等組織牽頭，名為「Compromiso por La Paz」（為了和平）嘅慈善賽，科蘭、費蘭度托利斯、加比等就新舊「床單」球員，就代表東道主，世界明星隊就有「細哨」朗拿甸奴、李城翼鋒馬列斯、施多夫、耶莫蘭高等各國明星，比賽都有唔少趣味性，好似費托率先射破前哥倫比亞國腳希基達把守嘅大門，希基達不甘示弱，主射12碼建功，都叫拎番個彩，埋單世界明星隊以5:4勝出，加埋九個入球又多星，入球嘅50,000球迷都應該收貨啦。
施蒙尼基沙文冇現身
不過咁，馬體會貴為主人家，教練施蒙尼同前鋒基沙文兩大主力都冇現身，施蒙尼就因為家事，要趕返阿根廷，所以出席唔到慈善賽，佢都向球迷講sorry，基沙文就去緊美國波士頓度假，之前入場睇塞爾特人嘅NBA東岸決賽，之後仲以嘉賓身份去綠軍基地，射三分波連入五球，有板有眼喎。