曼城早前大玩「擠牙膏」對外宣佈4位球員今夏離隊，包括門將韋利卡巴尼路，自然需要填補空缺。據英國《BBC》同《天空體育》等報道，曼城將會以破門將轉會費世界紀錄嘅4,500萬鎊（約4.49億港元）收購賓菲加23歲門將艾達臣摩拉斯，舊紀錄已經要數到祖雲達斯喺2001年以3,260萬鎊由帕爾馬簽入保方了；一旦交易落實，艾達臣亦會成為繼摩納哥中場貝拿度施華後，「藍月」今季第二簽。
艾達臣16歲就加盟賓菲加青訓，雖然其後一度被球會放棄，但佢轉戰低組別憑出色表現，喺2015年夏天再次加盟，並於今年3月首度獲召入巴西國家隊大軍。佢喺周日協助賓菲加2:1擊敗甘馬雷斯稱霸葡盃、成為國內「雙冠王」後，亦坦言勢將離隊：「我仲未知道去向，但呢場可能係我最後一次為賓菲加把關。」艾達臣嘅加盟不單令哥迪奧巴禾嘅正選位置備受威脅，同時亦意味過去一季外借意甲拖連奴嘅赫特歸隊機會凍過水。