有線寬頻昨日舉行股東特別大會，股東表決通過供股讓永升亞洲入主，有線終於逃出生天，而新主永升主席邱達昌身份特別，他是前亞視老闆邱德根的兒子，曾為亞視舊人、現為奇妙主持《杜汶澤食住上》的杜汶澤，昨在電話中表示：「同奇妙合作12集飲食節目，其實唔係好關我事。不過發覺員工創意同努力好足夠，所以都好戥佢哋高興。」
朱慧珊：新氣象
然而阿澤批評奇妙的覆蓋率不足：「作為觀眾覺得如果搞，再搞好啲，因為好多人反映話追唔到台，你話開一個電視台追唔到台，開嚟做乜呢？希望佢哋攞錢出嚟做電視台，認認真真咁做。」同樣在奇妙有節目《伍姑娘真識食》的伍詠薇則說：「唔使執笠，可以繼續做當然係好事，外國唔同地方都係好多電視台，有線仲可以保留係好事，恭喜恭喜！」朱慧珊雖然跟奇妙未有合作，但亦恭喜舊老闆邱達昌：「當然唔想佢好似亞視咁執笠，我知道邱生一直好想喺電視行業有所發展，而且好多舊同事同朋友都喺有線做緊，可以達成協議絕對係一件好事，相信會有一番新氣象。」
黃芳雯：士氣好
主播黃芳雯（Paula）昨日返公司錄影，指同事知道消息後都好開心：「起碼人人有工開，公司上下士氣都好好。」跟奇妙還有一年合約的李尚正則說：「股東通過都係意料中事，因為唔pass就肯定執，大家都冇錢剩，希望越做越好啦！」李麗珊亦鬆一口氣：「𠵱家好似打咗支強心針，之前有啲同事都會感到好徬徨。」而「妹頭」盧頌恩亦興奮說：「一天都光晒啦！之前都擔心，大家都係沉着應戰，因為唔想發放負能量。」
此外，前有線娛樂主播區永權則表示：「當然係好事，至少短期內唔會有人失業！希望善用資金製作好節目，讓各路英雄有用武之地！」另一前主播鄭文亦說：「有線新聞做得好好，我仲有好多舊同事喺度做緊。」
採訪：何永寧、馬建華、嵐山、劉定