想體驗10億港紙包圍係咩感覺？機會嚟啦飛雲！下個月中喺倫敦蘇富比搞嘅印象派及現代藝術晚拍，會拍賣4幅重量級油畫，總估值達到10億元，即日至31號會嚟到香港蘇富比藝術空間率先展出，等大家可以一飽眼福。
4幅畫入面最貴嘅，係被譽為「抽象藝術先驅」、俄國畫家康丁斯基（Wassily Kandinsky）嘅《白線構圖》，估值超過2.72億元。呢幅畫係「絕對抽象」代表作，深深影響20世紀繪畫發展進程。同場仲有佢另一幅作品《穆爾瑙——風景與綠屋》，估值1.5至2.5億元。
《女子與鳥》戰火中創作
都係天價嘅仲有西班牙畫家胡安米羅（Joan Miró）喺戰火中創作嘅「星座」系列第8幅作品《女子與鳥》，1945年首次喺紐約展出轟動一時，對美國藝術界有深遠影響，估值超過約2.33億元。由英國「光之畫家」泰納（J.M.W. Turner）創作嘅《埃倫布賴特施泰因》（1835）都會同場拍賣，估值1.5至2.5億元。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk