禮拜三（31日）舉行今季最後一次泥地夜賽，由於夜賽受場內燈光影響，故經常會見外叠之賽駒一條氣衝贏（日本馬壇稱之為大外一氣）的鏡頭出現。
以最近4月5日全泥夜賽為例，當晚就分別有「金地飛客」、「特獎」及「開心旅程」等從尾叠後上反先對手勝出，前置馬未必能夠像谷草一般佔壓倒性優勢。
今戰列陣馬中，出戰第二場之「糖黐豆」（方嘉柏馬房）今季兩次跑泥地夜賽獲一冠一亞，亦係全場唯一贏過夜泥之參戰馬，憑較佳場地性能可看好。
另外，角逐第七場的「小龍兒」（姚本輝馬房）上仗正是於泥地夜賽贏馬，等番同類賽事才再上陣，擺明有心想添食。