電視黃金時段，噚晚ViuTV有新劇《詭探》出爐，力撼無綫塵封十年嘅舊劇《蘭花刼》，《詭探》有邵仲衡、尹揚明、趙碩之同車保羅等演出，講述由尹揚明揸弗嘅神秘部門「第七行動組」，專門調查一啲靈異事件背後嘅真相，當中故事都係以香港人熟悉嘅都市傳說為藍本，包括93年鐵路廣告、公屋傳說、高街鬼屋同西貢結界。
對於《詭探》對撼《蘭花刼》，邵仲衡日前喺電話中哈哈笑話：「呢啲嘢兵行險着，人哋有計算嘅，字面解讀就唔同，我哋係全攻型，我哋火力都幾怒、幾惡，打442陣式足球，人哋可能打091戰術。」
車保羅多人斟
早前車保羅同尹揚明喺西環紙紮舖拍外景，而Mr.樂隊成員MJ亦客串演出。劇中演識得茅山術嘅尹揚明話：「同車保羅未入行已經識，以前拍嘢都未試過同場做戲，今次佢係做茅山師兄八爺。」問佢到紙紮舖拍嘢驚唔驚？佢話：「紙紮舖拍嘢都見慣晒，細細個都已經上香拜神，不過原來啲祭品咁先進，電話、跑車都紮到，真係要乜有乜！」又透露最近工作好多，要不斷遷就檔期：「近排又接咗電影啦！我一向好少捱夜拍攝，呢晚一定會通宵，第二日仲要接電影嘅中班。」
車保羅亦多咗好多人搵佢傾合作，不過就話好多工作都係「冇米粥」：「不過冇乜所謂，橫掂我都有份正職，要幫手嗰時咪盡量合作，𠵱家經濟生活係好咗。」
撰文：馮仁昭