意甲周日煞科又關美斯事？美斯今季已攻入37個西甲入球，歐洲金靴獎都算坐定粒六，不過都要等埋意甲最後一輪賽事，兩大前鋒迪斯高及梅頓斯有冇瘋狂刷數據，結果就當然冇啦，美斯最後以74分第四度拎歐洲金靴獎（見附表）。
連續九年被西甲壟斷
今次係美斯第四次、亦喺繼12/13球季後再拎呢個獎，講真自從08/09年開季，呢個獎已經由西甲壟斷，上季就係由巴塞MSN組合另一位前鋒蘇亞雷斯奪得；如果計埋其他盃賽，美斯今季入球更高達54個𠻹；以入球計，巴黎聖日耳門嘅前鋒卡雲尼都算追得比較貼，呢位烏拉圭射手今季入咗35球，但法甲系數只得1.5，所以累積52.5分只排第九；士砵亭嘅荷蘭射手巴斯杜斯，就以34球累積68分排第二，有美斯又點解冇C朗？原來C朗今季大幅減產，埋單入25球，周日仲俾拖連奴射手比洛迪過埋，最後只排第11位，足足落後美斯10位。「巴塞發言人」碧基，就當然為美斯發功，呢位中堅話：「美斯今季包辦咗西甲同歐洲金靴獎，實力唔使懷疑，金球獎唔畀佢可以畀邊個。」
巴塞推出新波衫
乘住美斯拎歐洲金靴獎嘅氣勢，巴塞亦都順勢推出下季新主場波衫；巴塞接受咗日本零售集團樂天嘅贊助，下季胸口廣告就換咗，傳統嘅紅藍直間就冇變，不過藍色直間就變得好幼。另外巴塞同日就宣佈同門將達史特根續約至2022年，巴塞更加將呢位25歲德國國腳嘅賣斷合約價提升到1.55億鎊（約15.7億港元），使唔使咁誇張呀！