你有壓力，我有壓力，香港地有邊個冇煩惱？更何況係公眾人物。人人減壓方法都唔同，健康啲嘅咪做運動跑吓步囉；傷身啲嘅，好多人會飲酒、食煙。(吸煙危害健康，衞生署綜合戒煙熱線︰1833 183)
娛樂圈都有好多藝人有吸煙嘅習慣，原因可能係方便，又唔會太影響工作啩。
經常被影到煙不離手嘅，要數撈家羅嘉良喇。羅嘉良早前回巢大台，拍攝《與諜同謀》外景時，就被影到喺李佳芯同一名童星面前煙不離手。就算唔係開緊工，羅嘉良自己一個人都係煙不離手，上年佢被影到自己一個人行ifc，5分鐘入面煙駁煙，係咪真係咁大癮呀？
同樣係佬味十足回巢大台嘅男星，「鷲哥」吳岱融都被人影過喺街煲煙，不過佢就冇咁招搖嘅。上年10月，吳岱融喺油塘出席完活動後，揸車直落九龍城，落車後四圍望嚟望去，原來佢係要搵位食煙。不過，點望都冇用，期間都有好多途人認得佢，不過吳岱融都好nice有打招呼嘅。
大家都知食煙會傷聲，不過有歌星照樣食煙，可能係為咗追求嗰份「味道」啦！憑住《命硬》、《好人》等等悲情歌為人認識嘅側田，近排就番上大陸搵人仔，但係都會喺香港蒲頭。上年3月側田就被影到同女友以及兩個朋友喺大坑煲煙，食食吓仲無啦啦除帽o添。