喺1987年無綫藝員訓練班畢業嘅潘芳芳，之後除咗拍劇之外，亦有擔任主持同配音嘅工作，喺工作上芳芳係屬於實幹型，喺感情生活上佢都係偏向低調。
潘芳芳喺94年同黃子華因為合作而撻著，呢段感情維持咗冇耐就分開，嗰陣有傳潘芳芳因子華事業未有起色，可以話係人生嘅低潮，冇耐決定分手。跟住佢同電影編劇李志毅相戀，但係最後都分手收場。喺00年潘芳芳被問子華已經人氣急升一事，佢話：「已經過咗去嘅事，再提都冇乜意思，0依家佢事業咁好戥佢開心！」
直到2005年11月5日，潘芳芳與前無綫導演兼港台DJ陳冠豪（Francis）結婚，講到呢段感情，原來佢哋認識超過20年，嗰陣芳芳喺無綫做青年大使，Francis就擔任幕後製作，但係礙於大家身邊都有另一半，所以一直維持朋友關係，後來Francis移民加拿大！
自爆係紅娘嘅李樂詩話：「Francis以前做過新城，後來返加拿大，我有音樂上合作， Francis同我傾開話自己以前喺無綫做嘢嗰陣已經鍾意潘芳芳，我咪將芳芳個電話畀佢，點知佢後來真係有所行動。」芳芳亦都話過大家相處咗某個時間之後，已經覺得性格好夾，有共識結婚，婚後合作開劇社。